TF-SAA
Gerð Diamond HK36TTC Super Dimona
Vænghaf 16,33m
Lengd 7,28m
Hámarkshraði 261km
Svifhorn 27
Dímonan eða Alfreð Alfreð eins og hún er oft kölluð er framleidd af Diamond í Austurríki og að upplagi er þetta sami skrokkur og Diamond DA-20, en vængirnir eru lengri, engir eru flaparnir, en í staðinn eru loftbremsur (e.air brakes) eins og í svifflugu. Hún er einstaklega öflug, vélin er búin 115 hestafla Rotax mótor með túrbínu sem gerir að verkum að hún jafnast á við bestu einkavélar hvað varðar mótorflug ásamt því að hægt er að slökkva á hreyflinum og svífa á við miðlungs svifflugur. Vélin er tveggja sæta og því oft notuð til að taka með gesti. Þetta er ein skemmtilegasta flugvél landsins og er einstaklega hljóðlát! Dímonan flokkast sem Ferðavélsviffluga / TMG eða Touring Motor Glider.
TF-SAC
Gerð ASK-21
Vænghaf 17m
Lengd 8,35m
Hámarkshraði 280km
Svifhorn 34
C-ið var keypt nýtt frá Alexander Schleicher í Þýskalandi 1995. Hún er tveggja sæta og mikið notuð í kynningar- og kennsluflug. Þá hafa félagsmenn einnig nýtt hana þegar þeir fljúga með sína gesti. Síðastliðin ár hafa flestir nemendur tekið sitt fyrsta einflug á C-inu. Leyfilegt er að fljúga listflug á þessari svifflugu og hafa sumir félagsmenn nýtt sér það. Þetta er vinsælasta kennslusviffluga heims, er sterkbyggð og virkilega góð sviffluga í kennslu.
TF-SAL
Gerð LS4
Vænghaf 15m
Lengd 6,84m
Hámarkshraði 270km
Svifhorn 40
L-ið var keypt notuð frá Segelfluggruppe Lenzburg í Sviss, árið 1999. Hún er einsæta af gerðinni LS4 og er framleidd af Rolladen--Schneider í Þýskalandi árið 1985. Þessari svifflugu fljúga flestir sem hafa lokið sín fyrstu einflugum á SAC en hún svífur umtalsvert betur.
TF-STK
Gerð LS4-a
Vænghaf 15m
Lengd 6,84m
Hámarkshraði 270km
Svifhorn 40
Þessi einsæta sviffluga er nýrri útgáfa af TF-SAL, framleidd árið 1990 af sama framleiðanda, Rolladen-Schneider í Þýskalandi. Hún kom til landsins notuð frá Lenzburg í Sviss, árið 1999. Svifflugan var svo keypt notuð af Sigmundi Andréssyni árið 2020. LS4-a voru framleiddar með stærri vatnstanka í vængnum til að auka hraða í keppnum.
TF-SAX
Gerð LS8-18
Vænghaf 18m
Lengd 6,72m
Hámarkshraði 280km
Svifhorn 48
X-ið er af gerðinni LS8-18m, er frábær viðbót við svifflugflotann. Árið eftir að svifflugan kom á markað urðu svifflugmenn á LS8 í toppsætum í keppnum og var hún á meðal bestu svifflugna í 15 og 18m flokki í nokkur ár á eftir. Það má segja að LS8 sé afbragðsgóð sviffluga og er mikið notuð í yfirlandsflugi. Hún er með í heildina 190 lítra vatnstanka í væng og stéli til að auka “skriðþunga” hennar til að hjálpa flugmönnum að ná hærri meðalhraða í keppnum eða útflugsverkefnum.Hægt er að skipta um vængenda og fljúga henni með 15m eða 18m vænghaf.
TF-SAS
Gerð Duo Discus T
Vænghaf 20m
Lengd 8,62m
Hámarkshraði 250km
Svifhorn 45
S-ið eða Dúó-inn eins og hún er oft kölluð, var þróuð og smíðuð hjá Schempp-Hirth árið 2000 í Þýskalandi með raðnúmeri 002. Hún var keypt notuð frá Þýskalandi árið 2006 í mjög góðu ástandi. Hún er tveggja sæta og hefur gríðarlega góða útflugs eiginleika. Hún er með innfelldan hjálparmótor (Turbo) í skrokknum sem hægt að setja út og nota til að hækka flug ef ekki finnst uppstreymi, það gerir hana að spennandi kosti jafnt fyrir þá sem eru að spreyta sig á sínum fyrstu yfirlandsflugum og reyndari flugmenn félagsins.
TF-TUG
Gerð Piper PA-25-Pawnee 235
Vænghaf 11,02m
Lengd 7,55m
Hámarkshraði 188km
Tuggan eða Unna Gunna sér um að draga svifflugur í loftið, kostirnir við flugtog umfram spiltog eru þeir að hægt er að sleppa í meiri hæð og einnig er hægt að draga svifflugur umtalsverðar vegalengdir áður en sleppt er. Einnig hefur Tuggan verið notuð til þess að draga svifflugur á Íslandsmótum á Hellu og á loft af túnum þar sem að þær hafa lent sökum skorts á uppstreymi.
Vírus
Gerð Ford F350 L6 300 ci
Hámarkshraði 40km
Vírus sér um að draga vírana úr spilinu yfir endilanga brautinna þar sem svifflugurnar bíða, einnig er hann notaður til að draga svifflugur til og frá skýlum.
Spilið
Gerð: Skylaunch 3
Hámarkshraði: ? 🙂
