16. - 22. ágúst

Dagana 16. -22. ágúst átti pistilskrifari að vera startstjóri, gegndi því embætti þó ekki nema eitt kvöld en sat þeim mun meira á spilinu. Jón Hörður bar hitann og þungann af kennslunni.

Mánudaginn var ekkert flogið.

Þriðjudaginn var vestan hang sem dapraðist þó þegar leið á kvöldið. Lendingarkeppni var á vélflugbrautinni sem tugir flugvéla tóku þátt í.

Á miðvikudag var NA-átt og flogin kennsluflug.

Fimmtudaginn var ákveðnari austanátt. SAS flaug tvö nokkuð löng flug og eins flaug Skúli yfirkennari sitt annað sólóflug í sumar, rúmar 40 mínútur. Önnur flug voru stutt.

Föstudagskvöldið var komin hvöss norðanátt, 20 hnútar og meira. Norðanstrekkingurinn gaf bylgjur sem skilaði sér í nokkrum löngum flugum, m.a. flaug Sverrir Þorláksson 3 tíma á SAX.

Á laugardaginn var sama veður og sló í 30 hnúta þegar best lét. Ásgeir Bjarnason og Daníel Stefánsson flugu í rúma 5 tíma á SWK. Ólygnir menn segja að þeir hafi flogið yfir Kerlingarfjöll og Keflavíkurflugvöll og virt fyrir sér menningarviðburði í miðbæ Reykjavíkur úr öruggri hæð. Karl Norðdahl var um 3 tíma á SBS og Eyjólfur svipað á SAL. Nokkur kennsluflug voru farin og þrjú flug með gesti og eru birtar myndir úr þeim flugum hér á síðunni.

Sunnudaginn var ekkert flogið. Það hefði svo sem verið hægt þrátt fyrir svolítinn rigningarhraglanda en menn líklega orðnir saddir eftir mikla flugviku eða þreyttir eftir menningarnótt.

Kveðja,

Hólmgeir Guðmundsson

MeiraSetja inn athugasemd (0)Wednesday, August 25, 2010

Fyrri færslaNæsta færsla

Lista allar færslur